sexta-feira, 21 de fevereiro de 2014

KATIBU NA REEMA SINHOR(A) NA DJUNGU!
Sol lanta lua kamba
Lua kamba luta kontinua
Sol manssi tuga nghangho larssi

Luta bin bin bin kaba
Festa ku manssida padjiga tchon na issa bandera
Suma urbadju di Djiba na bessamar
Flanu bin bin bin
Pa toma Saudu pa kriasson

Sol lanta Saudu i kriadu
Lua kamba Saudu i kriadu 
Si mandjua tan Djondjon kriadu 
Mukur mukur na Bairu

Sindjadura di Saudu si gato panhal i sia
Fedura sindjadura mestra ku homi di kassa naris ka bali
Mestra i tia homi i tio

Djondjon kalssa metadi te djudju
Faladu tchakual di kalssa di homi di kassa
Djanta kemado sia os di bom messa
Or ku hospris ten 
Purtuguis na kassa

Saudu ku Djondjon kriol keia ku fadi purtuguis
Saudu disdja bin bai 
Noti tchiga i dita mborkado
Sunho di Djondjon luta kaba

Bu djiressa diploma bali
Or ku Saudu mandjua Djondjon 
Kemado pa purku
Mis ta padi pa Saudu ku Djondjon

Dutur Ndjeheru i kuma faladu
Frio di kunfentu Saudu ku Djondjon 
Kentura di manta ku fidju di miss
Kalur balur rispitu di Saudu ku Djondjon

No djinti na sukuta
Palmo tokadu mon sangra
Kurus di tambur fura
Pubis ka buru

Motas rapatidu
Dinheru di kalur di pubi rapatidu
Bu matchundadi kaba na rapatida di kaminhu
Ninguin i ka ninguin na mistida di tchon

Si kabra ka kumeh fisson i pabia di tapada di kirintin
Djubi bu kabessa na spidju
Konta bu kabessa bardadi
Lala kema
Ninguin i ka ninguin na mistida di tchon

Abo
Abo Ndjeheru oh Dutur mpustur
Ku lei sin obi
Ku obi sin ntindi
Ka bu missa pubis totonah 

Bu djitu i nha fianssa
Falan luta kaba
Mininu di kriasson kaba
Skola ten liti pa kodeh ten tan
Nka misti bin bin bai

Sin nna bin bin bai
Pardeus
Saudu ku Djondjon 
Kriasson kuruss karass!

20 de févreiro 2014
Adulai Djalo - Montréal (Canada)

Sem comentários:

Enviar um comentário

ATENÇÃO!
Considerando o respeito pala diversidade, e a liberdade individual de opinião, agradeço que os comentários sejam seguidores da ética deontológica de respeito. Em que todas as pronuncias expressas por escrita não sejam viciadas de insultos, de difamações,de injúrias ou de calunias.
Paute num comentário moderado e educado, sob pena de nao sair em público