GUINEENDADE NA PO DI KURPO
Iagu ku sol, fartura ku mamandadi ka faltau
Bu padiduris pissadu ma eh ka pessadu
Liti ku bu bibi, bibron ka mati
No pudi bin bin sibi
Liti di Nna I branku fandan
Otcha tchon, terra rissibiu
Almas bibus ku almas di Blama djumbai na sabura
Puku puku, padas padas, domondin domondin
Bu alma bida spuma, alma Biafada
Bu ntindi ronia, bu kunssi ave maria ku allakbar
Na kontrada di sol ku lungha ku pimpinghi
Bu tchudidu tchon di bakadjau pa sedu mandjua di estins
Bu riba kassa otcha Ntchanga na karga dubi
Bu riba mas kassa otcha Ntchanga para karga dubi
Bu preto nok, bu sangui burmedju wak, bu dintis branku fandanh
Bu korsson gora?
Otcha iagu mas farinha na kassa garandi di rassa tcheben
Kankra ndjata firkidja
Bu fala elis kuma lungha el ki di nos
Bu firma suma bissilon di kobiana pa bin intindi kuma
Almami ndadi di miskita i ka tadju di kurpo
Sedu padri di guirissia i ka tadju branku
Puku puku, padas padas, doidoi
Bu paga bu kinghon na mistida di kil tempu
Otcha bu turpessa disdjau na kassa de rassa theben
Ermons kumssa sedu amigus di pa ku pikareta na simiteriu
Ermons nteranta nghutru suma na djitu di labur di midju, labur di mankarra
Tempu passa ku kana riba mas
Bu ta ribanta tempu, tempu de tchubas di 80
Otcha bu monstran andjus no ronku lanti ndans di tchon di YES
Fidjus di papes fidalgus
Bu tudjin seta nha orfondadi
Bu tchudin saida di sol di ermondadi
Tempu passa ku kana riba mas
Bu ta ribanta tempu, or ku tempu misti nega riba
Bu kalkan korsson na tempramentu di rapassiada kun sedu
Nlembrantau tempu otcha mandjuas pitu intchi
Tempu passa ku kana riba mas
Bu ta ribanta tempu, or ku tempu nega farr
No ntindinti nghutru kuma Djusse ku manda punta
No ntindinti nghuru kuma Bibus i ka di kanta
Na kau ku bida pistan mas di 20 tchuba dja
Bu firmanta bandera di terra - Guiné badjuda - ku bento di pali fassi ronku
Nna sta ku bo, ku nos, pa pudi kontra ku kabantada di distinu
Bu toka korsson di ermons spadjadu na DUNIA suma fundo na kampada
Ora ku sol na mansi o i na kai, HAMINA son
Aos, 15 di março, almas djudan pan ntergau seh recadu
Kibini seh fala ora ke bin misti bindi pitrol, bauchite, reia, alma di Nnaghna
Paka oss di no difuntus kamba mar lundju, lundju di baloba garandi
Tempa senssa!
Maldadi lundju bo suma kasseke ku roda di mar
Bondadi ku finessa na bo i suma talco na kurpu di andju
Tchon ku rissibiu i tchon ku penbiu na ndjita si fidjus pa bondadi
Bondadi ku laguau kurpu
Kuma fidjus di bom almas sta ku bo pa kompleta bu djitundadi
Bu riba mas kassa otcha Ntchanga para karga dubi
Bu preto nok, bu sangui burmedju wak, bu dintis branku fandanh
Bu korsson gora?
Bu korsson limpu suma iagu di BOMMA na korsson di Lesti
Bu korsson limpu suma iagu di NKALE ku di NTATCHA
Aos, 15 di março, almas djudan pan ntergau seh recadu
Kibini seh fala ora ke bin misti bindi pitrol, bauchite, reia, alma di Nnaghna
Paka oss di no difuntus kamba mar lundju, lundju di baloba garandi
Tempa senssa!
Na bu kontrada di aos, 15 di Marsso di 2014, fitcha udju bu odjanu tudu
Mon na mon ku bo, aos, amanha ku ermon di AONTI
No na mati na kabantada di distinu
Abarka Ma-Garandi!
Montréal, 15 de Março de 2014-03-15
Adulai Djalo - Lai
Sem comentários:
Enviar um comentário
ATENÇÃO!
Considerando o respeito pala diversidade, e a liberdade individual de opinião, agradeço que os comentários sejam seguidores da ética deontológica de respeito. Em que todas as pronuncias expressas por escrita não sejam viciadas de insultos, de difamações,de injúrias ou de calunias.
Paute num comentário moderado e educado, sob pena de nao sair em público